وزیرِ اعظم شہباز شریف اعلیٰ سطح وفد کے ہمراہ اپنے سرکاری دورے پر سعودی عرب کے شہر جدہ پہنچ گئے ہیں۔
جدہ ایئرپورٹ پر ان کا پرتپاک استقبال شہزادہ سعود بن مشعل بن عبدالعزیز نائب گورنر مکہ ریجن، سعودی عرب کے پاکستان میں سفیر نواف بن سعید المالکی اور پاکستان کے سعودی عرب میں سفیر احمد فاروق نے کیا۔
دورے کے دوران وزیرِ اعظم شہباز شریف کی سعودی ولی عہد و وزیرِ اعظم شہزادہ محمد بن سلمان بن عبدالعزیز آل سعود سے اہم دو طرفہ ملاقات متوقع ہے۔
اس ملاقات میں پاکستان اور سعودی عرب کے درمیان تعلقات کے فروغ، اقتصادی تعاون اور خطے کی مجموعی صورتحال پر تفصیلی تبادلہ خیال کیا جائے گا۔
وزیرِ اعظم کے ہمراہ نائب وزیرِ اعظم و وزیرِ خارجہ سینیٹر محمد اسحاق ڈار، وزیرِ اطلاعات و نشریات عطا اللہ تارڑ، وزیرِ اعظم کے معاون خصوصی سید طارق فاطمی اور وزیرِ اعظم کے ترجمان برائے غیر ملکی میڈیا مشرف زیدی بھی موجود ہیں۔
ذرائع کے مطابق یہ دورہ دونوں ممالک کے درمیان اسٹریٹجک اور اقتصادی شراکت داری کو مزید مضبوط بنانے کے لیے انتہائی اہم قرار دیا جا رہا ہے۔
Leave a Reply