جنوبی بھارت کی ملیالم فلم انڈسٹری کے مشہور فلم ساز اور اداکار رنجیت بالاکرشنن کو ایک اداکارہ کو جنسی ہراساں کرنے کی کوشش کے الزام میں گرفتار کر لیا گیا ہے۔
پولیس کے مطابق اداکارہ نے شکایت درج کروائی کہ فلم کی شوٹنگ کے دوران رنجیت نے انہیں ایک کارواں میں بلا کر ہراساں کرنے کی کوشش کی۔
شکایت کی بنیاد پر پولیس نے متعدد دفعات کے تحت مقدمہ درج کیا، جن میں خواتین کی عزت پامال کرنے، جنسی حملہ، ناجائز قید اور فحش حرکات شامل ہیں۔
رنجیت کو گزشتہ روز حراست میں لیا گیا اور آج مجسٹریٹ کے سامنے پیش کیا گیا، جہاں عدالت نے انہیں 14 دن کے عدالتی ریمانڈ پر بھیج دیا۔
یہ پہلا موقع نہیں ہے کہ رنجیت پر ایسے الزامات لگے ہوں۔ 2024 میں بھی ایک بنگالی اداکارہ نے ان پر ہراسانی کا الزام لگایا تھا، جس کے بعد انہوں نے کیرالہ چلاچترا اکیڈمی کی چیئرمین شپ سے استعفیٰ دیا تھا۔
رنجیت کے وکیل نے کہا ہے کہ وہ جلد ہی عدالت میں ضمانت کی درخواست دائر کریں گے تاہم کیس کی حساسیت اور عوامی توجہ کی وجہ سے قانونی کارروائیوں پر سب کی نظریں مرکوز ہیں۔
Leave a Reply