گلگت بلتستان کے انتخابی حلقے جی بی اے 17 (داریل) میں پولنگ کے بعد سنگین انتخابی بے ضابطگیوں اور پرتشدد واقعات کا انکشاف ہوا ہے۔
حلقے کے ریٹرننگ افسر (آر او) نے اس حوالے سے ایک تفصیلی اور تشویشناک رپورٹ ڈپٹی کمشنر دیامر کو ارسال کر دی ہے، جس میں الیکشن کے دوران پیش آنے والے سنگین واقعات کی نشاندہی کی گئی ہے۔
ریٹرننگ افسر کی جانب سے بھیجی گئی رپورٹ میں دعویٰ کیا گیا ہے کہ حلقے کے 6 پولنگ اسٹیشنز پر مسلح افراد نے دھاوا بولا اور وہاں سے بیلٹ باکسز اور دیگر انتخابی مواد چھین کر فرار ہو گئے۔
آر او نے رپورٹ میں بتایا کہ بعض مقامات پر پولنگ عملے کو نہ صرف ہراساں کیا گیا بلکہ انہیں شدید تشدد کا نشانہ بھی بنایا گیا۔
رپورٹ میں سب سے حیران کن اور تشویشناک انکشاف یہ کیا گیا ہے کہ 2 پولنگ اسٹیشنز کا انتخابی عملہ تاحال لاپتہ ہے جن سے کوئی رابطہ نہیں ہو پا رہا۔
رپورٹ کے مطابق ان پرتشدد کارروائیوں اور چھینا جھپٹی کے باعث متعدد پولنگ اسٹیشنز کا انتخابی ریکارڈ اور فارم 45 تاحال آر او آفس تک نہیں پہنچ سکا ہے۔
ریٹرننگ افسر نے یاد دہانی کروائی کہ الیکشن سے قبل ہی اس حلقے کی حساسیت کے پیشِ نظر تمام 46 پولنگ اسٹیشنز کو “انتہائی حساس” قرار دیا گیا تھا، تاہم اس کے باوجود مسلح عناصر انتخابی عمل کو سبوتاژ کرنے میں کامیاب رہے۔
Leave a Reply