پاکستان الیکٹرانک میڈیا ریگولیٹری اتھارٹی (پیمرا) نے ایک نجی ٹیلی ویژن چینل کو نوٹس جاری کرتے ہوئے لائیو نشریات کے دوران پیش آنے والے ایک واقعے پر وضاحت طلب کر لی ہے۔
یہ معاملہ اس وقت سامنے آیا جب ایک لائیو مارننگ شو کے دوران میزبان فضا علی کے شوہر نے انہیں کندھوں پر اٹھا لیا، جس کا منظر سوشل میڈیا پر تیزی سے وائرل ہوگیا۔ اس واقعے کے بعد بڑی تعداد میں صارفین نے اسے غیر مناسب قرار دیتے ہوئے تنقید کی اور پیمرا سے کارروائی کا مطالبہ کیا۔
سوشل میڈیا پر بڑھتے ہوئے ردِعمل کے بعد پیمرا نے نوٹس لیتے ہوئے متعلقہ چینل سے باضابطہ وضاحت طلب کر لی ہے۔ اتھارٹی کا مؤقف ہے کہ تمام براڈکاسٹرز کو نشریاتی مواد کے دوران پیشہ ورانہ معیار اور اخلاقی ضابطوں کی مکمل پاسداری یقینی بنانی چاہیے۔
دوسری جانب فضا علی نے اس صورتحال پر وضاحت دیتے ہوئے کہا کہ سوشل میڈیا پر ایک مختصر لمحے کو اس کے اصل پس منظر سے ہٹ کر پیش کیا گیا۔ ان کے مطابق یہ ایک غیر رسمی اور ہلکا پھلکا لمحہ تھا جسے غلط انداز میں لیا گیا۔
انہوں نے مزید کہا کہ وہ ہمیشہ اپنے کام اور ناظرین کے احترام کو مقدم رکھتی ہیں اور آئندہ بھی اپنی پیشہ ورانہ ذمہ داریاں اسی سنجیدگی اور ذمہ داری کے ساتھ ادا کرتی رہیں گی۔ ان کا کہنا تھا کہ بعض اوقات وضاحت کے باوجود معاملات کو غلط رنگ دیا جاتا ہے، اسی لیے وہ ایسے مواقع پر خاموشی کو بہتر حکمت عملی سمجھتی ہیں۔
اپنے بیان کے اختتام پر فضا علی نے کہا کہ وہ اس وقت اپنی پیشہ ورانہ مصروفیات اور ذاتی زندگی پر توجہ مرکوز کیے ہوئے ہیں اور تمام افراد کے لیے نیک خواہشات کا اظہار کرتی ہیں۔
Leave a Reply